يا ترى كم مرة سمعنا هالعبارة من كم بنت؟ طبعاً معروف إنه هاي العبارة تقال عادة عن الزواج التقليدي، لما ييجو ناس يشوفوا بنت عشان بنت يخطبوها وبتيجي أم بتعاين البنت من ساسها لراسها، فمن هنا يتولد شعور البنت بأنها بكسة بندورة أو أي نوع خضرة آخر فور ذات ماتر...

لكن اللي توصلتله جديد إنه مش هاي الزيارات التقليدية هي اللي بتخليكي بكسة خضرة، بالعكس، الموضوع أبعد من هيك، لا تزعلوا مني، إنت يا حبيبتي بكسة بندورة، وبكسة بندورة برخصة كمان، ليش؟

لما تيجي وحدة تتفرج على صور صاحبات بنتها على الفيسبوك عشان تنقي منهم عروس لابنها، بتكوني بكسة خضرة...

لما وحدة تفتح الييربوك تاع الجامعة وتتطلع على صور البنات وتطلع أرقام بيوت أهاليهم وتحكي تسأل إذا ممكن ييجو يعملوا زيارة بتكوني بوكسة خضرة (إذا كنت بيضا وعيونك خضر فتوقعي تلفون بيتكم برن كتير، الحلم العربي)

لما مديرك في الشغل يقول لك إنو ما بدو إياكي تلبسي حجاب عشان برستيج الشغل، ولازم تحطي ميك أب وتلبسي لبس معين عشان الزبون بدو يشوف منظر يسر عنيه بتكوني بكسة خضرة

لما تكون نص الدعايات والأغاني تكون فيها واحدة لابسة من غير هدوم بهدف الترويج للمنتج أو الأغنية بتكوني سلعة، أو بكسة خضرة

لما صاحبتك او قريبتك تاخد صورتك تورجيها لناس بدوروا على عروس عشان يحكموا عليكي ويشوفوا إذا شكلك بناسبهم بتكوني بكسة خضرة

لما تعرفي واحد كم سنة أو حتى كم شهر وبعدين تضلي تنقي عليه وتترجيه عشان ييجي يخطبك ويا عالم يهرب أو يستسلم وييجي في الآخر، بتكوني أسوأ من بكسة خضرة

لما تروحي على عرس وتتعمدي تلبسي أواعي مش المفروض تنلبس إلا في غرف النوم أو

لما تروحي على عزا مزبطة حالك ولابسة اللي على الحبل عشان بركي وحدة شافتك وعجبتيها، بتكوني عملتي حالك بكسة خضرة

فبالآخر، بلاش نضل نحكي عن الزواج التقليدي إنه سوق خضرة،  أنا وحدة من الناس اللي صعب عليهم يستوعبوا فكرة الزواج التقليدي أو أتقبلها، بس مش عدل نضل نجرح ف يالبنات اللي بتزوجوا تقليدي ونحكي عنهم بكسات خضرة،  خلينا نكون منطقيين ونحكي بالمنطق: لو كان الموضوع بصير ضمن الضوابط الشرعية، يعني الرجل ما بشوف من المرأة إلا وجهها وكفيها وما كانت لاطة حالها مكياج ولابسة لبس غريب عجيب، يعني كانت بشكلها العادي زي كل يوم، ما أظن إنه رح يكون حكم عليها من شكلها، ساعتها كيف بدها تكون بكسة خضرة؟ وأكتر إشي بقهر اللي بقول لما تكون البنت محجبة: بدي أشوفها بدون حجاب... ومين كاين إنت؟ يغني بالمنطق، إذا شفت شعرها وما عجبك رح تبطل؟ هيك بصير الموضوع سوق خضرة... لأ وبعدو يقولولك في فتاوى بتقول إنه بصير، وين هالفتاوى هاي؟ ولو سمعت هيك فتوى ما بقتنع فيها لأنه فيها نوع من الإهانة والتحجيم للمرأة لما تسمح للرايح والجاي يستعرضها كإنها بكسة خضرة

 فسبحان الله، الدين ما خلا إشي إلا وحطله ضوابط، مش بس عشان الفتنة ما تنتشر في المجتمع، عشان المرأة كمان تضل كرامتها محفوظة وما تصير بكسة خضرة للرايح والجاي...

طيب ماشي، تجميل رنات وأغاني ومش عارف شو صحيح بالنسبة إلي شخصياً حكي فاضي في الأغلب بس يعني ممكن الواحد يستوعبه، حتى في أشياء تانية تافهة أو مش تافهة والواحد بفهم إنه ماشي الواحد بستوعبها، يعني ممكن يقولك أخبار أو رياضة أو معاني أسماء أو حدث في مثل هذا اليوم أو حتى أبراج وهبل، كله متعودين عليه، بس إنه توصلني مسج تقول: النصائح الذهبية للحصول على عريس، هاي بصراحة ما مرت علي قبل هيك!  طبعاً من باب حب الاطلاع وأنا بكتب هادا البوست بعتت أشوف شو طبيعة هاي النصائح...

عن جد يعني خلينا نفكر في المنطق، لما وحدة يكون كتير جاي عبالها تتجوز ويوصل فيها اليأس لدرجة إنه تستعين بخدمة تلفونية معروف وواضح إنه الهدف منها لم المصاري، لأنه ما أظن إنه اللي بعملوا هاي الخدمات مصدقين عن جد إنهم رح يحلوا مشكلة العنوسة والزواج غير المتكافىء في البلد لما يبعتوا مسج بتقول مثلاً: لا تجلسي في بيتك منتظرة فارس أحلامك بل ابحثي عنه ليجدك

عن جد؟ لأ يعني عن جد عن جد؟

الموضوع مش موضوع عريس او أغاني تامر حسني أو صور ميرنا وخليل، المسألة مسألة قديش صاير في استخفاف في عقل المواطن حتى إنه صاروا يشوفوا صراف آلي يسحبوا منه مصاري بأي طريقة، بقرة يحلبوها تطلع ليرات أو بطة بتبيض دهب إذا سمعتها أغنية لعمرو دياب، يعني فهمنا ثورة اتصالات ومش عارف شو بس بالعقل... قززتونا!

المهم، لما بعتت لخدمة عريس الغفلة أشوف شو قصتها عملولي اشتراك فيها، إذا أي حدا عنده فكرة كيف ممكن ألغي الاشتراك بدون ما أحرج حالي وأتصل بأورانج وأقولهم إني اشتركت بخدمة العرسان يا ريت تفيدوني... أو ممكن أقولهم خلص لقيت اللي بدي إياه،  إلغي! يعطيكم العافية...

Few years have passed since then and although I passed by that house many times I didn’t hear similar noises again. I always wondered about the family though, but didn’t give it much thought, not until 2 days ago when I heard 2 neighbors talking about a woman in the street, who turned out to be the same woman I heard fighting with her husband years ago. It wasn’t over yet.

They said that the people who live next door to them hear them fighting all the time. They said that they heard their children crying while their parents fought and called each other names. They even said that from the sound of it the man seemed to be giving his wife a beating. They said they fought day and night and the neighbors could hear it all.

That night I stayed up at night thinking how this marriage could have survived all these years of possible physical, verbal and emotional abuse. What could’ve become of the children? Why are these people still together if they fight so much? Then I remembered the national campaign about domestic violence and how everyone is responsible, especially when it came to the children, and that’s when I started to seriously consider reporting them to Family Protection.

To tell you the truth, I still have my doubts about this. I mean, this woman must have endured all those years with her husband for a reason, so what if she refused to cooperate with the police or denied any abuse? But then I thought about the children. I mean she’s an adult and she’s free to do what she wants but it’s not up to her to expose her children to all that violence and abuse. But again, I thought that although this doesn’t seem like the happiest family on earth, but what if this intervention made it worse? What if the children were caught up in an ugly divorce and instead of watching their parents slamming each other at home they could be dragged to see it in court.

I’m really not sure what to do, but to think of what this could turn into I feel responsible to take and action to nip whatever might happen in the bud.

So, what would you do?

يعني لما وحدة تكون متزوجة واحد بعاملها، عفواً، أحسن من الزبالة بشوي، وبعمل فيها كل عملة ولا التانية، ومين ما بسمع عمايله، عفواً، بتف عليه، وبعدين بس يقولوا إنه البنت كانت ساكته عليه وما تحكي لحدا بقولوا...

"شكلها بنت عيشة وبدها السترة"

ليش هي كاينة مفضوحة عند بيت أهلها؟ وبعدين إذا هو مش "ابن عيشة" وإذا العيشة اللي عايشتها مش عيشة ليش بدها تكون بنت عيشة؟؟

طيب سيبونا من اولاد العيشة، أنا مش فاهمة شو عقدة البياض والشقار عنا إحنا العرب اللي مش قادرين نقضي عليها! كإنه الشقار رمز الحسن والجمال والسمار رمز البشاعة والقباحة... الله يقطع (فير أند لافلي) بس!! قال بيجيبوا البنت بتكن لابسة اواعي بتخزي ومبينة رح تعيط من الخوف وبعدين بس تستعمل فير آند لافلي فجأة بتصير عندها ثقة بحالها وأواعيها مرتبة! وقال شو قال بتنقبل في الوظيفة عشان بشرتها (مش عشان تغيرت 180 درجة) مزع...

بلاش دعايات فير أند لافلي؟ كم مرة سمعتوا جملة زي هاي:

"البنت بتجنن، بس إمها إنسي الموضوع سمرا وحالتها حاله!"

حالتها حاله؟ إيش يعني عندها شلل أطفال؟

هديك اليوم سمعت وحدة بتقارن بين وحدة وزوجها وبتقول إنه زوجها أحلى منها بكتير أما هي فـ"سمرة"، يعني كإنه ما في داعي توصف أكتر من هيك إنه خلص سمرا يعني أشكيف، بتتذكروا الأشكيف؟؟ طبعاً أنا كنت قاعدة وكوني سمرا واعتبرتها إهانة قررت ما أسكت وزتيت كلمة لما إجت فرصة مناسبة، وما في داعي أدخل هلأ في مزايا السمار وفوائده خصوصاً للبنات، بكفي إنه الناموس ما بقرب علي بدون ما أحط فيب ولا إشي، بينما إخواني بتهبروا في الصيف! الحمد لله يا ربي...  وبكفي إني بكون مريضة وما بحس في داعي أحط إشي على وجهي عشان ما أبين صفرا ومسحوب لوني

طيب، ما علينا...

وكإنه إحنا ناقصنا ستيريوتايبس وتفكير محدود عشان يجيبولنا مسلسل تاني يحدد أفكارنا ويضيع وقتنا أكتر وأكتر... طبعاً عن بحكي عن زفت الطين "نور"، مع الاعتذار لكل وحدة اسمها نور

أولاً، المسلسل اللي بطلع عليه نظرة محايدة بشوف إنه أتفه من التفاهة، لأ ليش هيك بنغلط بالتفاهة أصلاً، لسا التفاهة ممكن تكون مبتكرة، هادا المسلسل تفوق على جميع المقاييس وعمل فئة جديدة لحاله، يعني في تفاهة وبعد التفاهة بتيجي "نور"...

أنا عن نفسي ما بتابع المسلسل بس بما إنه وين ما تروح بتلاقي عالتلفزيون وبما إنه الأحداث اللي فيه فش فيها أي نوع من الغرابة أو التجديد وكل 10000 حلقة بصير تطور جذري فصرت أعرف القصة...

ما بدي أبدا الحكي عن القيمة الاجتماعية عن المسلسل لأنه باختصار مسلسل تركي وقيمه علمانية، بس ما بدي أفوت في هادا ابموضوع وخليني في القيمة الفنية (شبه المعدومة)

يعني أنا نفسي ألاقي إشي مثير للفضول أو الاهتمام في المسلسل، إنه أي مسلسل سوري أو مصري أو أردني لسا أحسن منه وعلى الأقل ما بضل 90 حلقة! يا دوب 30 حلقة وانتهى الموضوع... يعني محور المسلسل كله عن حياة عائلة، عادي يعني عائلة واحداث بتصير، طيب؟ شو علة هالقلب هاي؟ وطبعاً كل ما تلاقي القصة سكرت يا واحد بعمل حادث، يا وحدة بتسقط حملها، يا واحد بنجلط (طبعاً كالعادة الجد الكبير كل 5 دقايق ينجلط، والعجيب إنه بدو يتجوز... نفسه خضرا) يعني لا ابتكار ولا تجديد ولا بطيخ مبسمر، واللي بجلط إنه حتى الأطفال بتابعوه، وبدنا أطفالنا يطلعوا مبدعين ويفكروا خارج الصندوق (آوت أوف ذا بوكس)، كيف طيب كيف وهم عم بتفرجوا على مسلسل بعرض مشاكل نور ومهند اللي مش كاينة تخلص وكأنها محور حياتهم؟؟

وكله كوم ومهند كوم! إنه خلص إنت يا بيرفيكت يا سوبر مان! وكل ما يطلع مهند عالشاشة بتلاقيهم حطوا موسيقى هادية إنه إجا الدونجوان (مع الاعتذار لجوني ديب)، والمشكلة إنه كل هالرومانسية والحب والغرام وبعدين ما بلحقوا يحكوا كلمتين مع بعض إلا بتخانقوا! زي كإنهم اتنين مراهقين مصاحبين مش اتنين كبار عاقلين متزوجين... أي قرف اللي يقرفكوا! إنه مش عم تفهموا على بعض اتطلقوا يا أخي، خليها تروح تتزوج عابدين المريض النفسي وخليه هو يروح يتزوج بطيخة نهال! هاي قصة تانية طبعاً، قال وحدة دعستها شاحنة وهي حامل وضلت عايشة في السر وخلفت ولد كمان (شكلها بتقرب للمخرج)، وقال عشان يزبطوا الحبكة قالوا كانت ما بدها إياه يعرف إنها عايشة، يا عيني على التضحية والإيثار! طلعت تركيا المدينة الفاضلة تاعت أفلاطون! تاهت ولقيناها... أما مهند، فكيف واحد مرته بتكون نكدة كل هالنكد وبكون لهالدرجة منيح؟ وفوق هيك بكون توب موديل ومعاه مصاري نعف، يعني بخلي البنات يفكروا إنه نور مش احسن مني، يا بيجي واحد زي سي كازانوفا بسلامته يا بديش.... وعيش يا قديش لينبت الحشيش.. 

وأحلى إشي كيف فجأة الممثلين بتغيروا... عادة في المسلسلات الأمريكية مثلاً لما ممثل يضطر يغيب عن التصوير بغيروا القصة، مثلاً لما "بري فان دي كامب" في "ديسبيرت هاوسوايفز" غابت عن المسلس عشان تولد، بكل بساطة عملوا في المسلسل إنها سافرت وصورا كم لقطة إلها من ورا من دون ما يبين وجهها كانت فيها ممثلة بديلة مش هي نفسها، وزادوا مشاهد "إيدي بريت" وبكل ذكاء المسلسل مشي وبالعكس يمكن نجح أكتر لأنه في ناس بحبوا شخصية "إيدي"... مش بكون واحد شعره لكتفه وما عند شوارب فجأة في الحلقة اللي بعديها بصير واحد شعره قصير وعند سكسوكة...  وبعدين شكلو الأطفال بكبروا بسرعة رهيبة في المسلسل، يعني "رقية" ولدت و"نور" لسا حامل، وصارت بنت رقية مبين عمرها سنة ونور لسا حامل.... شو حامل بفيل؟؟ بس أكتر لقطة بتضحك واللي بتستاهل جائزة لما كان عابدين خاطف نور وبربطها في حبل وبقلها إنهم لازم يكونوا مع بعض وهي بتقول له: "إحنا أصدقاااااء" حمارة هاي؟ 

يعني باختصار، هادا المسلسل تفوق على ذا بولد أند ذا بيوتيفل وذا يونغ أند ذا ريستلس وعلى دايز أوف آور لايفز... لحظة لحظة، بعد التفكير يمكن لسا ما تفوق على ديز أوف آور لايفز، لسا بدهم كمان شوي، منيح إنه المسلسل لسا ما خلص!!

على كل حال، هاي نور شكلها مش "بنت عيشة"، منيح اللي مهند متحملها فوق ماى هي "سمرا"...

وعجبي