في أشياء في الحياة ممكن الواحد يستوعبها، إنه هي بتصفي بالآخر زي ما تقولوا هيك قزز بس برضه الواحد بقدر يتعايش معها لدرجة معينة، يعني مثلاً بتخيل إنه كل واحد فينا سواء كان مشترك مع فاستلينك اللي صاروا يحكولها زين أو موبايلكم اللي تحولت لأورانج أو أمنية اللي طلعتلهم بالسحبة، كلنا كمواطنين أردنيين على اختلاف أسمائنا وأشكالنا وألواننا وأعراقنا وانتماءاتنا وعقدنا النفسية كلنا بجمعنا شيء واحد، وهو إنك بتكون قاعد في حالك لا إلك ولا عليك، ويمكن تكون بتستنى مسج مهم، وفجأة برن موبايلك، ون مسج ريسيفد يعني، بتقوم بتنط ويمكن تطلع من الحمام بسرعة لأنك مستني المسج صارلك ساعتين وأول ما تكبس "أوبن" يكون هول المفاجأة إنه المسج من رقم غريب، ومش رقم عادي إنه يضل عندك أمل وتقول شكلو عفاف معهاش كريديت، لأ! رقم مكون من 4 خانات، ومكتوب فيها: لتحميل أغاني عمر العبدللات اتصل على الرقم xxxx طيب ماشي، تجميل رنات وأغاني ومش عارف شو صحيح بالنسبة إلي شخصياً حكي فاضي في الأغلب بس يعني ممكن الواحد يستوعبه، حتى في أشياء تانية تافهة أو مش تافهة والواحد بفهم إنه ماشي الواحد بستوعبها، يعني ممكن يقولك أخبار أو رياضة أو معاني أسماء أو حدث في مثل هذا اليوم أو حتى أبراج وهبل، كله متعودين عليه، بس إنه توصلني مسج تقول: النصائح الذهبية للحصول على عريس، هاي بصراحة ما مرت علي قبل هيك! طبعاً من باب حب الاطلاع وأنا بكتب هادا البوست بعتت أشوف شو طبيعة هاي النصائح... عن جد يعني خلينا نفكر في المنطق، لما وحدة يكون كتير جاي عبالها تتجوز ويوصل فيها اليأس لدرجة إنه تستعين بخدمة تلفونية معروف وواضح إنه الهدف منها لم المصاري، لأنه ما أظن إنه اللي بعملوا هاي الخدمات مصدقين عن جد إنهم رح يحلوا مشكلة العنوسة والزواج غير المتكافىء في البلد لما يبعتوا مسج بتقول مثلاً: لا تجلسي في بيتك منتظرة فارس أحلامك بل ابحثي عنه ليجدك عن جد؟ لأ يعني عن جد عن جد؟ الموضوع مش موضوع عريس او أغاني تامر حسني أو صور ميرنا وخليل، المسألة مسألة قديش صاير في استخفاف في عقل المواطن حتى إنه صاروا يشوفوا صراف آلي يسحبوا منه مصاري بأي طريقة، بقرة يحلبوها تطلع ليرات أو بطة بتبيض دهب إذا سمعتها أغنية لعمرو دياب، يعني فهمنا ثورة اتصالات ومش عارف شو بس بالعقل... قززتونا! المهم، لما بعتت لخدمة عريس الغفلة أشوف شو قصتها عملولي اشتراك فيها، إذا أي حدا عنده فكرة كيف ممكن ألغي الاشتراك بدون ما أحرج حالي وأتصل بأورانج وأقولهم إني اشتركت بخدمة العرسان يا ريت تفيدوني... أو ممكن أقولهم خلص لقيت اللي بدي إياه، إلغي! يعطيكم العافية...
أنا مش فاهمة، معقول في ناس في البلد همج وما بستحوا لها الدرجة؟ معقول في ناس عندها هيك عقلية؟ معقول في ناس هيك بتدور عالمشاكل وما بهمها الأذى اللي ممكن يسببوه للناس؟؟ القصة صارت هيك. قبل شوي طلع اخوي بالسيارة وراح يجيب أخوي الصغير من المدرسة. المهم، وهم في الطريق كان في مجموعة شباب عم بقطعوا، خفف السرعة وخلاهم يمرقوا، وبعد ما قطعوا الشارع قام واحد منهم لف بسرعة وركض عند السيارة، بطبيعة الحال أخوي ما لحق يوقف مع إنه ضرب بريك قوي بس برضه ضرب الولد بطرف السيارة. المهم، الشاب وقع على الارض، قام أخوي صف على اليمين ونزل يطمن عليه وفجأة قام الولد اللي اندعس واصحابة الثلاثة ولا الأربعة اللي معاه هجموا عليه بالعصي والمكانس والله أعلم من وين لحقوا يجيبوها، ونزلوا فيه ضرب ونزلوا ضرب بالسيارة طبعاً أخوي عرف إنه صعب عليه يواجههم لحالو وخاف أكتر لأنه أخوه الصغير معاه فخاف يعملوا فيه إشي، قام ركض على السيارة وشغلها فلحقوه وضلوا يخبطوا فيه وفي السيارة وبعدين فتحوا باب الجهة اللي قاعد فيها أخوي الصغير وكان معهم عصاي، بس الحمد لله تدخل واحد من الشارع وأخوي شغل السيارة بسرعة وهرب والأبواب مفتوحة... خلاصة الأضرار إنه السيارة اللي - جبناها قبل شهرين - انضربت من الجنب، بس الحمد لله طبعاً والأهم الحمد لله إنه إخواني ما صارلهم إشي بس يمكن أخوي الصغير تعقد نفسياً... ولسا مو عارفين شو بدنا نعمل، إذا اشتكينا للشرطة ممكن يتسلطوا هدول النور على أخوي أو على السيارة وخاصة إنا عايشين في نفس المنطقة، وخايفين يتبلوا علينا ويقولوا إنه اللي اندعس صارلو إشي مع العلم إنه كان يضرب مع اللي بضربوا، فعلى الأرجح إنه رح ننسى الموضوع، وخوفاً من إنه الشرطة ممكن يكون فيها ناس بعرفوا هدول الشباب ويصفوا معهم وتطلع على راسنا... ما هو في هاي البلد ماشي قانون الغاب، بتعرفوا قانون الغاب؟؟ أكيد في ناس شرفاء وبصفوا مع الحق بس ما بتعرف شو ممكن يطلعلك... على كل حال آخر المستجدات إنا بلغنا الشرطة لإثبات الحالة (تعدينا فيهم قبل ما يتعشوا فينا) بس اللي بدي أوصله إنه هدول الشباب وأمثالهم بدهم ترباية، سيارات الشرطة اللي دايرة ليل نهار لازم تضب هاي الأشكال. لسا بقولوا شباب الوطن وثروته البشرية وسباع الليل منا تهاب! هاي زبالة الوطن البشرية اللي لازم تنضب وتتربى وتتلم من الشوارع... وين أهاليهم يضبوهم؟ وين الحكومة تضبهم؟ مزع يمزع هيك ثروة بشرية هاملة بصرمايتي... لو صار إشي لواحد من إخواني شو كانوا بيستفيدوا هدول الحيوانات؟ وين متربيين هدول؟
حاسة حالي بدي أكتب قصيدة غزل! بس بما إنه مش لاقية مقدمة غير شعرية فرح أبدا على بلاطة لأنه الموضوع مش وجه شعر...0 من الأشياء اللي بتعجبني في الشعب الأردني، قوة ملاحظته... والأحلى من هيك إنه بنحب نبرهن هادا الإشي. يعني مثلًا وأنا في الجامعة كان في بنت شكلها كاينة مغتربة وراجعة عالأردن تدرس في الجامعة الأردنية، فكانت تقعد في زاوية عند كلية الآداب، في حالها ومالهاش في حدا، كل يوم هيك. وفي يوم من الأيام، إجا واحد من أبناء شعبنا الباسل بقوللها: إنت دايماً قاعدة هون. فالبنت فكرته بدو يحكي إشي فقالتله: طيب؟ قام قال: لا ولا إشي بس لاحظت إنك دايمًا بتقعدي هون...0 يخزي العين، حوطتك بعشرة تحت الشجرة يمّا...0 من الأشياء التانية اللي بتعجبني جداً في الشعب الأردني كيف كلنا بنكون بنبحلق في بعض. في الشارع، في المطاعم في القهاوي وين ما بدك... السبب غامض، بس الظاهرة أشهر من أن تعرف ومعترف فيها... أنا شخصياً كتير مرات بلاقي حالي بطلع في الناس وأنا ماشية، ليس ما بعرف... طبعاً الموضوع بصير محرج مرات، خاصة إنه في ناس عندهم جنون شك ممكن يخافوا، واللي عندهم جنون عظمة ممكن يفكروك معجب، واللي عندهم عقدة نقص ممكن يفكر إنه فيه إشي غلط. وبما أنه شعبنا يزخر بهذه الحالات، فالأحسن الواحد يدير باله...0 ومما يعجبني في الشعب الأردني كمان الإصرار والمثابرة حتى تصل الفكرة. إنه شو بالنسبة للسيارة الحمرا اللي صافة على دوار عبدون وفاتحة ابوابها على مدار الساعة؟ (بتهيألي الكل بعرفها منيح) يعني فهمنا إنه عندك سيارة فراري حمرا مثل الدحنونة (سحب إلياس الفرد وطخ وما فكعتش الكبسولة...) وإلها ابواب لامبرغيني وقصص... بس إشي ومنه! أنا حاسة هاي السيارة صارت معلم من معالم عمان، زي بنك الإسكان...0 ومن الأشياء اللي بتعجبني في الشعب الأردني برضه مفهومنا الغريب للكرم اللي ببحوله لقزز... يعني مثلًا: 1: تفضل معنا 2: شكراً، شبعان 1: يا زلمة جاملنا 2: تسلم يا سيدي بس متغدي ومش قادر آكل 1: يا زلمة لقمتين شو بدهم يساووا 2: يا حبيبي ما بحبه 1: طيب جرب بس ما رح تندم 2: بقولك مش قادر 1: علي الطلاق إلا إنت ماكل! وهكذا دواليك... وبيعجبني في الشعب الأردني خيالنا الواسع. (ملغي عشان ممكن أروح فيها طخ هاي) ما علينا... من الأشياء الجميلة كمان فينا القدرات التمثيلية الباهرة، خصوصاً لما تشوف واحد بتعرفه في الشارع وبدك تعمل حالك مش شايفه. واللي ببهرك في الموضوع ثقتنا العالية في قدراتنا لدرجة إنه بتكون مارق في شارع فاضي فش في غير إنت والشخص اللي بدك تعمل حالك مش شايفه، وبرضه بتعمل حالك مش منتبه! فنان...0 وعلى سيرة التمثيل، من الأشياء اللي بتعجبنا كلنا بتصور المستوى الفني للتمثيل في الأردن. إنسوا المسلسلات، زهقنا قد ما حكينا، خلينا نشوف الدعايات مثلاً أو السكيتشات القصيرة اللي بحطوها عشان الانتخابات وغيرها... يعني امبارح شفت مشهد كان في ولد صغير بغني، بدون يمين بدون يمين فكرته بتخوت! مشهد كوميدي يعني... طبعاً طلع إشي عن جد عن السياسة والمفروض يثير فيك المشاعر الوطنية، ومع ذلك لا يخلو الأمر من بعض النغاشة، والمشكلة إنه لما المفروض يضحكوك بزتولك دبشة قد راسك... قمة النغاشة أما الدعايات فحدث ولا حرج. هلأ إنه العم غافل ومحمود صايمة يطلعوا في نص الدعايات مش مشكلة، عادي، أهون من أشياء تانية كتير، بس اللي مش قادرة أفهمه شو هالإعجاب الشديد باللحن الوحيد للفنان شعبان عبد الرحيم حتى يتكرر في أكثر من دعاية؟ وبعدين شركات الدعاية والإعلان في الأردن فش أكتر منها، ليش دعاية توفي بلازا زي ما هي من قرن ونص؟ ولما غيروها زادت الطينة بلة... نفس الستايل بس هالمرة صار مكرر، والمشكلة إنه عالفضائية، يعني فضيحة وعليها شهود! بصراحة معذورين الناس اللي برة إذا بفكروا الأردنيين بروحوا عالشغل راكبين على جمال...0 أما ما يثير الإعجاب بحق فهي المسابقات التلفزيونية ومستوى الغباء والاستهانة بعقلية المواطن. يعني لما تعطيك المذيعة سؤال زي: ما هي عاصمة مصر؟ وتقولك الخيارات: عمان ولا القاهرة ولا دمشق؟ (مع التشديد على الخيار الصحيح وبتقولك خير الأمور أوسطها) وبعدين بس يجاوب المواطن الكريم بربح الأردن باللي فيها... يعني مش عارفة شو الإشي الفظيع اللي عمله اللي بخليه يربح جوائز قد تصل قيمتها إلى أكثر من 1500 دينار! سكوتر وقطعة أرض في المفرق وغيره... والناس المساكين نازلة تتصل عشان تشارك، وللعلم فقط، المكالمة الواحدة بتكلف أكثر من دينارين وفي ناس ممكن يجربوا يتصلوا 20 و30 مرة... وبصراحة أنا حاسة إنه اللي بربحوا الجوائز معروف مين هم ومزبطين وضعهم، ما بقول إنه أكيد بس مش بعيد على هالبلد... طيب بدل ما تعطوا متصل واحد مليون جائزة، ربحوا ناس أكتر! بس فعلاً الموضوع شكله مش مزبوط طيب بلاش المسابقات التافهة، فش أكتر من صالونات الشعر والمكياج في الأردن، ليش هالمذيعة المسكينة بتطلع كإنها ماكلة بوكس في نص عينيها (على أساس سموكي) وشعرها عليه طن سبراي وموقف كإنها شايفة شوفة؟ يا لطيف اللطف يا رب! جد كنت أحزن عليها، إنه البنت حلوة ما مالها إشي بس ليش هيك يعملوا فيها؟ ومش مرة ولا مرتين...عجبوا عليها المسخمة الملطمة! طبعاً هذا مجرد غيض من فيض، وما زال الإبداع مستمراً، واللي بعيش بشوف!
If you go to any random office, open any random drawer, what do you think you'll find? I'll tell you. You'll probably find one, some or all of the following: 1- Panadol tablets 2- Multi-vitamins 3- Lubricant eye drops And the list goes on… What's wrong with us? People in the past were functioning very well and probably complained much less than we do without these things. Are we growing fragile and feeble with all these computers and noise and pollution and crappy diets and stress, talk about stress! Everyone has to run… And what about this dirty syndrome of feeling sleepy and never having enough sleep at work, but when you get home, you're brisker than a squirrel! That was just a quick rant after the headache I've been having since yesterday. It wouldn't go even after sleep and chocolate! But It's much better now after exercise and some multi vitamins!
<<Home
