إخواني...

أقوال لا أفعال، المرأة نصف المجتمع، أطفالنا أكبادنا تمشي على الأرض، لا للضرائب، نعم لحق العودة، لا تطبيع مع إسرائيل، القدس وعمان توأمان، كلنا للوطن، كلنا الأردن، كل الأردنيون أردنيون (لا؟ أنا كنت مفكرة نصهم أردنيين ونصهم موزمبيقيين)، لا للغلاء، صوتكم أمانة، حقوقكم أولاً، الصدق أولًا، الديمقراطية أولاً...

نيجي للمفيد، زبدة الزبدة، الصافي، من الآخر...

أولاً، رح أمشي على مبدأ طعمي التم بتستحي العين، بس ما رح يكون في مناسف في بيوت شعر، لأنه بما إني عم بستهدف الجيل الصاعد فرح أوزع كوبونات مجانية لكل مطاعم الفاست فود اللي في البلد، ما رح أخلي هارديز ولا برغر كينغ ولا ماك ولا أزبل مطعم في البلد يعتب علي. طبعًا هادا الإشي إلوا فوائد أخرى، وهو إنه الطفل بس تضل تحشيه جنك فود على مدى عدد معين من السنوات بوصل يوم الانتخابات عقله في جزمته ومسكرة معاه ومش شايف الفضى... قول له انتخب القرود السود بقوللك ع راسي. فهاي هي الخطة الخماسية هون، زمن المناسف راح

ثانيًا، شعارات مناهضةالواسطة والمحسوبية هاي كلها بديش إياها. نعم للواسطة، نعم لمحاباة القرايب والحبايب، نعم للعشائرية... اللي بدو رخصة سواقة، عندي، اللي ابنه جايب 65 فرع أدبي وبدو يدخله طب، عندي، أي معاملة في مؤسسة حكومية عندي موضوعكم، إنتوا بس وصلوني للبرلمان وما عليكم! لأنه بصراحة ما بدي أقعد أتخوت وأقول لا للواسطة وكل الأردنيون سواء وبس أحط رجلي في البرلمان وكل ولاد عمامي وخوالي وصحابهم يدخلوا طب وهندسة وياخدوا رخص عمومي يحكولي في مساءلة قانونية... الصراحة راحة وأنا قلتلكم من الأول، أنا بحب أستفيد من مركزي تو ذا ماكس، ولا نائبة واضرب واطرح عالفاضي!

ثالثاً: لاستمالة المثقفين في البلد، بدي أكتب كتاب أسميه "كفاحي" وأوزع نسخ منه ببلاش على كل ناخب، وبدي أحضر كل المسرحيات الأردنية وأعمل زيارات دورية لنقابة الفنانين وأدعم الدراما الأردنية وأطلع ضيفة شرف في كل مسلسل بدوي وأطلع على يسعد صباحك وأوقف أغني "يا مصور صور عمان" (بلاي باك طبعاً) والمذيعة المسكينة واقفة تزقفلي وتطلع علي، وأنشر 600 مقال في جريدة شيحان... هيك ببين واحدة فهمانة ومطلعة على الحركة الثقافية في البلد

رابعاً: من باب استهداف فئة الشباب، بوزع تذاكر سينما ببلاش، وتذاكر مباريات الدوري الأردني، وبوزع اشتراكات الجزيرة الرياضية عشان يشوفوا مباريات برشلونة وريال مدريد،  بس طبعاً لا يمكن تحت أي ظروف إني أكشف مين بشجع...

خامساً: اللافتات الانتخابية هاي شكلها مش جايبة همها، أنا بفضل أطبع صورتي على بكيتات شيبس وشوكولاتة وعلب كبيرت وبكيتات فاين، اسمه إشي بستفيدوا منه الناس... وأهم إشي أحط صورتي على بكيتات السجاير، بس طبعاً عشان ما يزعلوا حماة البيئة بحط صورتي وأنا مكشرة وبحذر من أخطار التدخين، وهيك بضرب عصفورين بحجر: بتسلل إلى اللاوعي للمدخن الأردني، وأحصل على التقدير الواعي من غير المدخن...

سادساً: إذا ما نفعت كل الأمور المذكورة أعلاه، بستأجر كم واحد دواوين من الآخر، إشي من قاع الدست، بوزعهم على البلد وبشتري لكل واحد موس كباس سويسري أصلي... إحنا ما بدنا نغصب حدا، بس إذا الشعب مش عارف مصلحته، عدو نفسه، فلازم علينا كمرشحين نورجيهم غلطهم بس

سابعاً وأخيراً: بضرب صحبة مع محمد الوكيل، ما بعرف كيف ممكن أستفيد منه بس عندي شعور إنه ممكن ينفعني في الحملة الانتخابية الشعواء... إضافة إلى إنه بدي أحاول ألاقيلي صلة قرابة من أي نوع مع نمر بن عدوان أو الملك فاروق

عودة إلى التقاليد:

نحن منكم وإليكم، نعمل لأجلكم، انتخبونا تجدوا ما يسركم... وعلي وعلى أعدائي