وبعدين مع هالفضايح؟ وين شعبه يضبه هاد؟ فش وراه حدا؟
يعني فعلا في حكام غريبين... شايفلك إياهم كل ما بكبروا عم بنهبلوا... ولك استحي على شيبتك القذافي استحى يعملها
القصة وما فيها إنه كتير غريب، جد غريب يعني واحد ينحبس عشان شتم/ تعدى/ سب/ عمل مش عارفة شو على حسني مبارك... خلص خلصت قضايا الأمة العربية والإسلامية وكل الشعوب ميتة في دباديب حكامها -خصوصاً الشعب المصري ولا واحد في ال80 مليون بسب على حسني مبارك، لا لا لا مستحيل- وما ضل عنا غير إنه واحد من الناس سب على حسني مبارك على الإنترنت، سامع فيها الإنترنت سيادة الرئيس؟
أقولك؟ طز
نرجع للموضوع الرئيسي، يعني شو صار لما حكموا على عبد الكريم بالحبس 4 سنوات؟ هيك بتردعوا الناس؟ شو رأيك إذا أنا حكيت عنك مثلا جبان وغبي وعار على الأمة وعلى بلد تاريخها زي تاريخ مصر؟ مين بدو يحبسني أنا؟ لو إني عايشة في سوريا ممكن، بس هون عمي في ديمقراطية، يعني بمعنى آخر أحمض ما عندك اطبخه وأعلى ما في خيلك اركبه
هلأ، شو اللي قاهرني في الموضوع باختصار؟ على بلاطة، المستوى اللي وصلناله في العالم العربي في التعامل مع الرأي الآخر والمعارضة...مش إشي بخزي هاد؟خايف من واحد عشان حكى عنك كلمة؟ على شو خايف؟ خلص راحت عليك يا معلم، آخر أيامك يا باتنجان...ما ضل في العمر قد اللي راح ومصيرك لمزبلة التاريخ، لسا صدام أهون، صدام مات بكرامته، إنت بتتذكر مرة شو حكيت تعليقا على الرد على أمريكا؟
"الله! دي أمريكا!"
!يا زلمة أمريكا اللي تلفحك قرفتونا في عيشتنا، قال حكم جمهوري استحي على دمك شوي
أحكيلك هالقصة، أظن بتعرفها...
هادا لما إجا رسول كسرى على عمر بن الخطاب ولقاه نايم تحت شجرة بدون حرس ولا ترس شو حكى؟
عدلت فأمنت فنمت
بالضبط زيك هيك يعني... شنعت ففقعت فانشل تاريخ عرضك فحبست من قام بذلك
بس معلش، آخرتك تنزاح، يا إما عالقبر عدل... مالهاش حل تاني على قول عمرو دياب
February, 23, 2007 1:48 PM