يعني من المخجل، بل من المخزي إن صح التعبير، إنه تكون الدنيا قايمة قاعدة و الوضع زي ما إنتوا شايفين و الأخبار العاجلة نازلة زخ خبر ورا خبر، وتيجي يا رعاك الله تقلب بين هالمحطات و تلاقي قنوات عربية، و أضع300 خط تحت كلمة عربية، عايشة في عالم لحالها، و الأغاني التافهة شغالة على ودنو... و كأنه ما عندها خبر باللي عم بصير برا! يا جماعة قصفوا الجنوب! لا يا شيخ! قول و غير
ولا ليش نستعجل بالحكي... يمكن يكونوا سمعوا بـ"عرس المقاومة" فحبوا يشاركوا في الآكشين... و زغرطي يا أم الشهيد، قصدي زغرطي يا عروسة
طيب بلاش! مش خايفين على هيفا و نانسي يكون صارلهم إشي في القصف؟ لا لا لا! هيفا و نانسي يمكن طلعوا من زمان، و شو بعرفكم، يمكن يكونوا هلأ بسجلوا أغاني وطنية، برافو! هادا هو اللي بدنا إياه! أصلا إحنا اللي دمرنا في ال 48 و ال 67 إنه ما كان عنا هيك أشكال... ولا كان عنا قنوات هادفة بتبث برامج بناءة بتعزز "التوجه الوطني" لدى الشباب
يا ريت يعملولنا موسم إكسكلوسيف من ستار أكاديمي للحرب، عشان يعملولنا كم سهرة وطنية لأجل لبنان... 0
على هالسيرة، أيام كأس العالم ما كان عنا شغل بالشركة، قال الناس ما بتتفرج على مسلسلات و أفلام في كأس العالم! يا ترى هل سيخف الشغل في وقت الحرب؟ بما إنه الناس ممكن تصير تتابع الأخبار و ما عندها وقت تحضر مسلسلات و أفلام كتير... مثلا يعني
على كل حال لا يسعني إلا أن أهيب بكل جبهات النضال على المستوى الإعلامي، ابتداء من مزيكا مرورا بمزيكا زوم (و نفسي أعرف شو الفرق بينهم) وانتهاء بميلودي و دريم ون (و فرق شاسع بين دريم ون و دريم تو، شيزوفرينيا رسمي) و أقول لهم سيروا و نحن من ورائكم، و خليكم هيك بركي بطلع جيل ما بعرف وين بتيجي فلسطين عالخريطة و لا بعرف شو يعني خريطة أصلا... و ليكن شعارنا دائما
أمة عربية واحدة، ذات رسالة خالدة، و رقصني يا جدع
July, 17, 2006 2:15 AM